Webgune honek cookieak erabiltzen ditu ahalik eta erabiltzaile-esperientziarik onena eskaintzeko. Cookieen informazioa zure nabigatzailean gordetzen da, eta hainbat funtzio betetzen ditu: gure webgunera itzultzen zarenean zu ezagutzea eta gure taldeari web orriaren zein atal iruditzen zaizkizun interesgarrienak eta erabilgarrienak ulertzen laguntzea.
Artea eta fedea · Urduliz
JASOKUNDEKO ANDRA MARIA
Bisitari agurgarria, ongi etorri Santa Maria elizara. Tenplu hau, Euskal Herri osoak, eta bereziki Urdulizek, Jainkoaren Amari zion gurtza zaharrari esker eraiki zen. Errenazentista estilokoa, XVIII. mendearen amaieran eraiki zen aurrekoaren aztarnen gainean. Harlanduzko harriz egindako hormak baliatu zituzten. Oinplano angeluzuzena eta kareztatutako hiru ganga dituen nabe bakarreko eraikuntza da. Tenplura sartu aurretik ikusi duzunez, mendebaldeko muturrean dorre sendoa dago, 1673an eraikitako estalki erdizirkular batez errematatua.
Orain, erdiko pasillotik bisita hastera gonbidatzen zaitugu, bururaino iritsi arte. Alboetako hormetan, GURUTZE-BIDEKO hamalau egonaldien erliebeak daude. Askotan, Jesusi Pasioan eta Heriotzan laguntzea hilobian amaitzen dela dirudi, Gurutzea ez dela porrota ahaztuz, Berpizkundearekin iritsiko den heriotzaren gaineko behin betiko garaipenaren ataria baizik. VIA LUCIS. Bere semeari bere Pasio berreroslean laguntzen, Fatimako Arrosarioko Andra Mariaren irudia dago, Fatimako Ama bezala ezagutzen dena.
Tenpluaren burualdera iristen gara. Bere absidean erretaula nagusia dago. Alboetan, 1775 urte inguruko rococo estiloko bi erretaulek edertasun eta harmonia handiko multzo paregabea osatzen dute.
“Zeren Jainkoak ez baitzuen Semea mundura bidali mundua kondenatzeko, haren bitartez salbatzeko baizik”
Joan 3, 17
Ezkerrean, Arrosarioko Andra Mariaren erretaula dago. Bere ezaugarri finak eta lasaitasun handia ditu. Maria ama gazte bat bezala agertzen da, bere Semea aurkezten digu eta eskuineko besoa aurreratzen du bere arrosarioa hurbilduz. Tamaina txikiko tailuak, San Joakim eta Santa Ana, Ama Birjinaren gurasoak eta, beraz, Jesusen aitona-amonak, lagun dituzte. Multzoa koroatzen, Mariaren senarra den San Joseren irudia dago, Jesus Haurra lagun duela.
San Anton Abaden tailuak eskuineko erretaularen erdiko horma-hobia hartzen du. Alde batean, Paduako San Antonio dago, Jesus Haurra besoetan duela irudikatzen den santu bakanetako bat. Beste aldean, San Isidro Nekazaria, nekazarien zaindaria. San Migel Goiaingeruaren irudiak, deabrua oinpean duena, multzoa koroatzen du.
“Hona hemen Jaunaren mirabea. Gerta bekit zuk esan bezala.”
Lukas 1, 38
Erretaula nagusia ikusteko unea da. Xehetasunez egiteko, aurreko bankuetan esertzera gonbidatzen zaitugu, edo, nahiago baduzu, aldarerako sarbidea ematen duten eskaileretan. Erretaula nagusia, Pedro de Alloytiz eskultorearen lana, barroko klasizista estilokoa da eta 1666an eraiki zen. Bankua, hiru gorputz eta Kalbario eder batez errematatutako teilatupea ditu. Has gaitezen behealdetik. “Ama Birjinaren Jaiotzaren” eta “Ama Birjinaren Ikustaldia bere lehengusina Santa Isabeli” erliebeak ikus ditzakegu.
Hurrengo mailan, ezkerretik eskuinera, salomondar zutabe dotoreen artean, San Pedro eta San Joan Bataiatzailearen tailuak daude. Horien gainean, “Ama Birjinaren Aurkezpena tenpluan” eta “Santa Ana eta San Joakinen Besarkada Jerusalemgo Urrezko Atearen aurrean” erliebeak ikusten dira. Azken eszena hau Pseudo Mateoren ebanjelio apokrifoan agertzen da. Historia Trentoko Kontzilioan ezabatu zen (1545/63), baina herriaren debozioan iraun zuen. Horren adibide ona da ehun urte geroago erretaula honetan agertu izana. Erretaularen erdian Jasokundea dago, eta tenplua hari sagaratuta dago. Ama Birjina, bere bizitzaren amaieran, Zerura gorputz eta arimaz igotzen den unea irudikatzen du, sei aingeruk bere joan-etorrian laguntzen dioten bitartean.
Goialdean, bi frantziskotar santuren irudiak daude; bere sortzailea, San Frantzisko Asiskoa, gurutzeari eusten eta San Antonio Paduakoa. Bitartean, erdialdean, “Mariaren Koroatzearen” erliebe altua ikus dezakegu; Birjina Maria Hirutasun Santuak koroatzen du Unibertsoko Erregina bezala. Teilatupean eta erretaula bikain honen gainean Kalbario bat aurkituko dugu, bere ohiko konposizio ikonografikoarekin; Jesukristo gurutzean, bere amarekin, Ama Birjina, eta San Joan Ebanjelaria ikasle maitatuarekin batera. Multzoa errematatzen duten bi aingeruak ondorengoak dira, 1836an erretaulan sartuak.
“Seinale handi bat agertu zen zeruan: emakume bat, eguzkiz jantzia, ilargia oinazpian eta hamabi izarreko koroa buruan”
Apokalipsia 12, 1
Erretaula ezkerrean, Jaunaren Presentzia Eukaristikoa Sagrarioan, tenpluko altxorrik handiena oharkabean joaten da. Kristo biziak salbatu eta berrerosi egin gaitu, dohain oparitu digu betiko bizitza, eta beti dago gure ondoan.
Amaitzera doa elizako bisita, zeinetan uztartu baititugu artea eta fedea. Bisita atsegina gertatu izana opa dizugu. Elizatik irten aurretik, gonbita egin nahi dizugu zure baitara biltzeko eta otoitzerako tartetxo bat har dezazun, Gure Amaren irudi abegitsuaren aurrean isiltasunean eserita, eta gogoeta egiteko haren bizitzari buruz, besteei emana eta esker onean oinarritua izan baitzen. Edo Sagrarioaren aurrean Jainkoa gurtu eta loriatzeko. Horretarako, eskuragarri dituzu hainbat otoitz, une honetan lagungarri izan daitezkeenak, baita erretaulen Santuen bizitzan sakontzeko estekak ere.
“Gure salbamena Kristoren odolaren oparia da, Jainkoaren dohain eta guganako baldintzarik gabeko maitasunaren dohaina delako”
BASELIZA
Gure herrian Santa Marina baseliza ere badago, izen bereko haitzetan. XV. mende bukaerako eraikina da, nabe bakarrekoa eta oinplano irregularrekoa. Horma batean haitz bera dago, eta bertan dago kokatuta, moztuta eta landuta. Eguna uztailaren 21ean ospatzen da eta bezperan baselizaren inguruan erromeria alai bat ospatzen da, Urduliz eta Sopelako bizilagunak biltzen dituena.
MAGNIFICAT
Jaunaren handitasuna dut goresten, pozaren pozez daukat barrena, Jainkoa baitut salbatzaile. Bere mirabe ezerez honengan jarri ditu begiak; horregatik, dohatsu deituko naute guztiek gaurdanik.
Gauza handiak egin ditu nire alde Ahalguztidunak. Santua da eta gizaldiz gizaldi errukitsua begirune diotenentzat.
Bere indar guztiaz jokatu du: buru-harroak suntsitu ditu, ahaltsuak goi-postuetatik bota eta ezerezak gora jaso; ondasunez bete ditu gose zeudenak, eta esku-hutsik bidali aberatsak; lagun etorri zaio bere herri Israeli, bere errukiaz oroiturik: hala hitzemana zien gure arbasoei, Abrahami eta ondorengoei betiko.
ZERUKO ERREGINA
Poztu zaitez, Zeruko erregina, aleluia!
Zuk sabelean eraman zenuena, aleluia!
Esan bezala perpiztu zen, aleluia!
Jaungoikoari gure alde eskatu, aleluia!
Poztu eta alaitu, Maria Birjina, aleluia!
Jauna zinez berpiztu da-eta, aleluia!
Jesu Kristo zure Semearen Pizkundearekin lurra atsegin duzun Jauna:
arren eskatzen dizugu, bere Ama Andre Mariaren bidez.
azkengabeko bizitzaren poza lor dezagula.
Jesu Kristo gure jaun beraren bitartez.
Amen.
BISITA BIRTUALA
EGIN ZURE EKARPENA
Autofinantzaketa da katoliko guztiok geure gain hartu behar dugun erronka, gure komunitatea mantentzea gure esku baitago. Hori familia-harpidetzaren bidez egiten da, erosoa, egonkorra eta Errenta Aitorpenean desgrabatzen dena.